EOE.is

Þar, sem ég er að fara að útskrifast eftir tvo daga er ekki úr vegi að vísa á lagið Pomp and Circumstances March no.1 eftir Edward Elgar. Þetta lag er ávallt leikið við útskriftir í háskólum hér í Bandaríkjunum, og sennilega víðar. Ég fæ alltaf gæsahúð þegar þetta lag er spilað í bíómyndum, svo ég get ekki beðið eftir að heyra það við mína útskrift.

Annars veit ég lítið um þennan Elgar, þannig að þetta verður sennilega ekkert voða gott klassískt horn. Mér finnst mjög sniðugt að Viðar Pálsson skuli vera með klassískt horn á síðunni sinni. Ég spilaði lengi vel handbolta og fótbolta með honum. Einu umræðurnar um tónlist, sem ég man eftir var þegar hann, í einhverri ferð uppá Skaga, hélt því fram að gítarleikari einhverrar dauðarokksveitar væri sá besti í heimi. Það er greinilegt að hans tónlistarsmekkur hefur breyst mikið.

Ég fór með þrem vinkonum mínum í bíó á sunnudag. Þær voru búnar að velja myndina og fékk ég að fljóta með. Við sáum The importance of being Earnest, sem er byggð á leikritinu eftir Oscar Wilde.

Þessi mynd var nokkuð góð en hún minnti mig náttúrulega á Þorstein Marínósson, enskukennara í Verzló. Allir nemendur í mínum árgangi voru látnir lesa þetta skemmtilega leikrit. Þorsteinn átti oft erfitt með að skilja áhugaleysi nemenda enda fannst honum, réttilega, þetta mjög fyndið leikrit. Þorsteinn átti því til að leika öll hlutverkin í leikritinu með miklum tilþrifum. Alltaf þegar ég sá Judi Dench í myndinni minnti hún mig á leikræna tilburði Þorsteins þegar hann las hlutverk Lady Bracknell.

Annars finnst mér alltaf hæpið að gera kvikmyndir eftir leikritum. Mig minnir að Dial M for Murder hafi verið gerð eftir leikriti og var það alltaf frekar augljóst, þar sem allir atburðirnir áttu sér stað á sama staðnum. Samt tókst þessari mynd að gera nokkuð vel úr leikriti Wilde.

Það er búið að vera nóg að gera síðustu daga vegna þess að ég er að flytja úr þessari holu, sem ég hef kallað mitt heimili síðustu þrjú ár. Ég er búinn að vera að reyna að pakka öllu þessu dóti og hef hent alveg ógurlegu magni af drasli. Í dag fór ég svo á hjálpræðisherinn með 5 poka fulla af fötum.

Annars er lítið spennandi búið að gerast síðustu daga. Er búinn að vera að hanga með vinum á kvöldin og svo hefur maður horft á fótbolta fram eftir morgni. Því hafa svefn venjur mínar verið ansi skrítnar undanfarið.

Ég og Dan horfðum á Mexíkó og Bandaríkin í fyrradag. Ég hélt með Mexíkó en hann auðvitað með Bandaríkjunum. Ég vorkenni Mexíkóum afskaplega mikið eftir þennan ósigur.

Það er nefnilega þannig að fótboltinn var nokkurn veginn það eina, sem Mexíkóar voru betri í en Bandaríkjamenn. Það er erfitt að vera nágrannar valdamestu þjóðar í heimi og Mexíkóar eru með mikla minnimáttarkennd gagnvart nágrönnum sínum í norðri. Þeir gátu þó alltaf montað sig af því að þeir voru betri í fótbolta.

Ég man einu sinni þegar ég bjó í Mexíkó að ég var að tala við einn vin minn yfir nokkrum tequila staupum. Ég hélt því fram að Bandaríkjamenn væru á uppleið í fótboltanum á meðan það væri stöðnun í Mexíkó og því væru Bandaríkjamenn orðnir betri. Þetta var eina skiptið, sem mér tókst að reita Mexíkóbúa til reiði. Ég held að hann hefði verið alveg jafn reiður ef ég hefði kallað systur hans hóru.

Á spænsku sjónvarpsstöðvunum hér er bandaríska landsliðið kallað “El equipo de todos”, eða lið allra. Þetta er náttúrulega útaf því að flestir spænskumælandi geta sameinast um bandaríska liðið enda eru þeir frá öllum löndum Suður-Ameríku. Hins vegar þá halda mexíkóskir innflytjendur með Mexíkó. Jafnvel þeir, sem eru fæddir hér halda tryggð við Mexíkó. Þetta er því gríðarlegt áfall fyrir þá.

Ég er búinn að setja inn nokkrar nýjar myndir. Þetta eru myndir úr nokkrum partíum og baseball leik.

Til að skoða myndirnar smelltu á “Meira”.
Lesa áfram »

Þá er ég búinn að flytja allar færslurnar og setja upp allt nýja dótið á þessari nýju síðu, www.einarorn.com.

Ég er byrjaður að nota Moveabletype, sem er að mínu mati mun betra kerfi en Blogger. Það býður uppá fullt af eiginleikum, sem ég er að nýta mér og ég á ábyggilega eftir að bæta við fleiru í framtíðinni.

Það er fullt af nýjum fídusum á þessari síðu. Til að byrja með, þá er nú komið kommenta kerfi. Ef þú vilt senda inn ummæli við færslu, þá smellir þú einfaldlega á ummæli fyrir neðan hverja færslu. Í ummælum er meðal annars hægt að nota broskalla.

Allar færslurnar eru nú flokkaðar niður. Flokkarnir eru eftirfarandi: Bækur | Dagbók | English | Ferðalög | Hagfræði | Kvikmyndir | Myndir | Netið | Sjónvarp | Skóli | Stjórnmál | Tækni | Tónleikar | Tónlist | Viðskipti | Íþróttir. Þú getur valið flokkana hér hægra megin. Ég held að þetta sé nokkuð sniðugt kerfi því sumir, sem heimsækja þessa síðu hafa meiri áhuga á stjórnmálapælingum heldur en djammsögum.

Einnig er hér hægra megin nokkuð sniðugur hlutur en það eru gamlar færslur, “Á þessum degi”. Þarna verða færslur frá fyrri árum. Þar, sem ég er búinn að uppfæra síðuna í meira en tvö ár, þá ætti þetta að vera sniðugt.

Einnig er hér til hægri dagatal, þar sem hægt er að sjá færslur frá vissum dögum í hverjum mánuði. Endilega segið mér hvað ykkur finnst. Öll tilmæli eru vel þegin.

Það er frekar góð tilfinning að hafa ekkert að gera. Þurfa hvorki að læra né vinna þessa vikuna. Þess vegna er ég búinn að eyða síðustu dögum horfandi á baseball og fótbolta, vinnandi í nýju síðunni minni og á djammi með vinum.

Á fimmtudaginn fór ég útað borða með Elizabeth vinkonu minni. Hún kom hingað nokkuð seint og því vorum við ekki búin að borða fyrr en um 11 leytið. Við fórum þá heim til Dan, þar sem partí var í gangi. Flest fólkið var búið að vera þarna nokkuð lengi og því voru flestir mjög drukknir. Þetta partí var ágætt og ég gat kvatt fulltaf fólki, sem var að fara eitthvað í sumar. Becky vinkona mín var að fara aftur til New York og svo gat ég kvatt Ryan, fyrrum herbergisfélaga minn, en hann ætlar að fara með kærustu sinni til Vermont, þar sem þau verða að vinna í sumar.

Á föstudag var ég að reyna að pakka einhverju af dótinu, sem ég ætla að senda með Eimskip heim til Íslands. Um kvöldið fór ég með Katie, Kristinu og Elizabeth í partí, sem var heima hjá vinkonu Elizabeth. Þar var auðvitað ókeypis bjór og var bara nokkuð gaman, þrátt fyrir að við höfðum ekki þekkt mikið af fólki þarna. Einhverjir strákar voru að horfa á fótboltaleikinn, Paragvæ-Þýskaland. Það er alltaf gaman að sjá bandaríkjamenn horfa og tala um fótbolta.

Allavegana, þá í gær, laugardag fór ég í útskriftina hennar Hildar, sem var haldin í kirkju rétt hjá Northwestern campusnum. Mark Kirk, sem er þingmaður fyrir Illinois var heiðursgesturinn og hélt hann ræðu, ásamt einhverjum nemendum. Hildur brilleðari í náminu og fékk hún m.a. Wall Street Journal verðlaun fyrir hæstu einkunn í viðskiptadeildinni, þannig að allir ættu að óska henni til hamingju.

Þegar ég kom heim horfði ég svo á England vinna Danmörk, sem var mjög gaman og svo horfði ég á Cubs vinna White Sox, sem var ekki síður skemmtilegt. Um kvöldið var ég eitthvað latur og ætlaði ekki að gera neitt. En svo hringdi Dan í mig og við ákváðum að skella okkur á “Pumping Company”, sem er bar í norðurhluta Chicago. Þar þurfti maður bara að borga $5 inn og svo fékk maður ókeypis bjór. Staðurinn var þó ekkert til að hrópa húrra fyrir og við gáfumst upp rétt eftir klukkan 2. Við fórum þá á lítinn “diner”, þar sem ég fékk mér French Toast og svo tókum við strætó heim.

Þá er ég búinn í prófum. Vá, en skrítið. Er að fara að útskrifast eftir viku.

Annars byrjaði dagurinn hræðilega. Ég hafði ætlað að vakna klukkan 6 til að fara yfir smá hagfræði fyrir prófið. Málið var að ég og Dan höfðum verið að læra hérna til klukkan 2 og svo horfði ég á smá fótbolta. Allavegana, ég steinsvaf yfir mig. Af einhverjum ótrúlegum ástæðum, þá fór þjófavörn á bíl af stað klukkan 10 mínútur í níu. Mér tókst að hlaupa niður í skóla og var mættur fimm mínútum of seint.

Prófið var leiðinlegt. Ekki meira um það. Ég er svo búinn að vera að stússast við ýmislegt í dag. Ég fór í klippingu, setti bílinn minn á sölu og talaði við mömmu og pabba úr almenningssíma á lestarstöðinni, þar sem síminn hérna heima virkar ekki.

Núna er klukkan 9 um kvöld og ég er á leiðinni að fara að hitta Elizabeth, vinkonu mína. Við ætlum að fara út að borða og svo erum við að fara í partí með fulltaf fólki seinna í kvöld.

Athyglisverður pistill, sem birtist í Wall Street Journal í gær. Blað í Boston birti nýlega tengil yfir á myndband á netinu af því þegar Daniel Pearl, blaðamaður á Wall Street Journal var hálshögvinn af pakistönskum öfgamönnum.

Það er með ólíkindum að það skuli vera hægt að nálgast þetta myndband mjög auðveldlega á netinu. Allir þeir, sem kunna á leitarvélar á netinu geta fundið myndbandið á innan við mínútu. Blaðið, sem birti tengilinn hélt því fram að tilgangurinn væri sá að gera fólk meðvitað um alvarleika hryðjuverkamanna.

Fyrir mér er tilgangurinn fyrir blaðið að græða peninga með því að ná athygli á kostnað þeirra, sem þjást.

Ég veit að ég ætti sennilega að vera sofandi í stað þess að vera að vaka til að horfa á HM. Ég er nefnilega að fara í skemmtilegt hagfræðipróf í fyrramálið.

Allavegana, þá fór ég á astro.is og ég þekkti bara fullt af fólki. Ja hérna!! 1 – 2 – 3.

Farðu að sofa Einar!