« september 10, 2001 | Main | september 16, 2001 »

"I'm afraid we might have awaken a sleeping giant"

september 11, 2001

Ég er svona aðeins að reyna að átta mig á atburðum dagsins. Þetta er búinn að vera alveg hræðilegur dagur.

Ég var á leiðinni í vinnuna þegar árásirnar áttu sér stað. Ég var að hlusta á Howard Stern (sem sendir út frá New York) en samt hljómaði ekkert óvenjulega. Þegar ég kom hins vegar inná skrifstofu sagði Mary Jo, sem vinnur með mér, að hún hefði heyrt á leiðinni að lítil flugvél hefði hrapað á World Trade Center. Mér fannst þetta dálítið skrítið og reyndi náttúrulega strax að komast á netið og við kveiktum líka á útvarpi. Þá heyrðum við að í raun hefðu tvær stórar farðegaþotur skollið á World Trade Center.

Það var ómögulegt að komast inná alla bandarísku fréttavefina, þannig að maður varð að treysta á útvarpið. Stuttu síðar komu svo fréttir frá Chicago um að verið væri að tæma Sears Tower, sem er hæsta bygging í Bandaríkjunum. Ég hringdi heim í Hildi og vakti hana og hún kveikti strax á CNN í sjónvarpinu.

Í dag var síðasti vinnudagurinn minn, en það var ekki mikið unnið. Ég sat frammi hjá ljósritunarvélunum og við hlustuðum þar öll á útvarpið, en CBS með Dan Rather, voru með samsendingu í útvarpi og sjónvarpi. Smám saman komu fréttirnar svo frá Washington D.C. og Pittsburg. Ég man að á tíma var talað um að ráðist hefði verið á Camp David og að enn ein flugvél væri á leið til Washington D.C. Maður vissi ekki hvort maður ætti að vera hræddur eða bara hissa. Konurnar á skrifstofunni voru grátandi, því að fréttirnar voru mjög ruglandi. Við þekkjum öll fólk bæði í New York og Washington D.C.

Svo um klukkan 11 var okkur gefið frí í vinnunni og sagt að fara heim. Aðalástæðan fyrir því var sú að fyrirtækið er mjög nálægt O'Hare, sem er sá flugvöllur í Bandaríkjunum, sem hefur mesta traffík.

Ég keyrði því heim og kveikti strax þar á sjónvarpinu og er síðan þá búin að horfa á sjónvarpið í mest allan dag. Við erum með um 80 stöðvar í sjónvarpinu. Ég held að um 3-4 hafi haldið áfram venjulegri dagskrá. Allar hinar stöðvarnar annaðhvort sýndu atburðina eða höfðu bara skilti, þar sem þeir lýstu yfir sorg yfir atburðunum. Öllum atburðum hefur verið frestað. Öllum íþróttaleikjum hefur verið frestað og mörg fyrirtæki munu hafa lokað á morgun.

Það eru margar spurningar, sem vakna eftir þessa atburði.

  • Hvernig í ósköpunum er hægt að ræna fjórum farðegaþotum í einu?
  • Ef að eina, sem var notað, voru hnífar einsog hefur verið haldið fram, af hverju gátu engir farþegar yfirbugað árásarmennina? Ef við ímyndum okkur að um 80 manns hafi verið í hverri vél, þá eru væntanlega 40 karlmenn. þannig að ræningjarnir hljóta að hafa verið margir. Ef þeir hefðu verið t.d. 5, þá hefðu 40 karlmenn örugglega yfirbugað þá, sama þótt árásarmennirnir hefðu verið með hnífa.
  • Hvert átti þotan, sem hrapaði við Pittsburg, að fara?
  • Af hverju er ráðist á Washington D.C. þegar George W. Bush er staddur í Florida

Hvað á maður að hugsa eða segja. Sumir vitna í Nostradamus, aðrir kenna stefnu Bandaríkjanna um. Ég á ekki orð til að lðsa fyrirtlitningu minni á þeim, sem fordæma þessi atvik ekki fyrirvaralaust. Það er ekki á nokkrum máta hægt að kenna utanríkisstefnu Bandaríkjanna um þetta. Sama í hve mörgum löndum Bandaríkjamenn hafa afskipti, það hefur enginn rétt til, eða getur stutt, svona hræðilega og heigulslega árás. Það er hámark heigulsháttar að ráðast á saklaust án þess að taka á sig ábyrgðina.

Það er nokkuð ljóst að almenningur í Bandaríkjunum vill hefnd. Sumir gera sér ekki grein fyrir því að almenningur í Bandaríkjunum á afskaplega erfitt með að skilja af hverju fólk hatar þetta frábæra land. Ég hef auðvitað lítinn skilning á ástæðunum. Öfund er vissulega stór þáttur, en aðrir þættir spila væntanlega þar líka inní.

En fólk vill hefnd. Á skrifstofunni minni í morgun heyrði ég konurnar heimta aðgerðir. Þær, einsog flestir Bandaríkjamenn vilja aðgerðir sem fyrst. Ég held að það sé þó ljóst að Bandaríkjamenn munu ekki grípa til aðgerða nema að þeir finni út nákvæmlega hverjir stóðu að baki þessu.

Það er kannski dálítið kaldhæðið að á þessum hræðilega degi fyrir Bandaríkin þá erum við Hildur að flýja land. Við ætlum að halda til hins friðsæla lands í norðri, Kanada.

708 Orð | Ummæli (0) | Flokkur: Stjórnmál

Kmart

september 11, 2001

Kmart búðir hafa hætt að selja byssur. Hvað á maður að segja?

12 Orð | Ummæli (0) | Flokkur: Dagbók

Update nr.10

september 11, 2001

Ok, það er búið að loka skrifstofunni minni. Ekkert alvarlegt, bara varúðarráðstafanir. Ég er farinn heim.

16 Orð | Ummæli (0) | Flokkur: Dagbók

Update nr.9

september 11, 2001

Nú er talað um að flugvél hafi hrapað nærri Camp David, sumarleyfisstað forsetans.

13 Orð | Ummæli (0) | Flokkur: Dagbók

Update nr.8

september 11, 2001

Núna er búið að senda upp bandarískar orrustuþotur til að mæta flugvélinni, sem er á leið til Washington D.C. Þeir menn, sem fljúga þeirri vél gætu þurft að gera hræðilega hluti, skjóta niður landa sína.

35 Orð | Ummæli (0) | Flokkur: Dagbók

Update nr.7

september 11, 2001

Nú hefur önnur flugvél hrapað nálægt Pittsburg.

Þetta er án efa einn svartasti dagur í sögu Bandaríkjanna. Skyndilega virkar Chicago ekki endilega örugg. Allavegana er núna verið að tæma allar stærstu byggingarnar í Chicago.

34 Orð | Ummæli (0) | Flokkur: Dagbók

Update nr.6

september 11, 2001

Núna er búið að tilkynna að það sé flugvél, sem hafi verið rænt, á leið til Washington D.C. Maður getur bara beðið fyrir fólkinu.

24 Orð | Ummæli (0) | Flokkur: Dagbók

Update nr.5

september 11, 2001

Svo virðist núna sem báðir World Trade Center turnarnir hafi hrunið. Um 50.000 manns unnu í byggingunum.

Einnig sprakk önnur sprengja í Washington D.C.

24 Orð | Ummæli (0) | Flokkur: Dagbók

Update nr.4

september 11, 2001

Önnur World Trade Center byggingin er hrunin

7 Orð | Ummæli (0) | Flokkur: Dagbók

Update nr.3

september 11, 2001

Allur syðri hluti Manhattan er fylltur af reyk. Tilkynnt hefur verið um aðra sprengingu, á fyrstu hæð World Trade Center.

Öllum flugvélum hefur verið skipað að lenda.

27 Orð | Ummæli (0) | Flokkur: Dagbók

Update nr.2

september 11, 2001

Nú er verið að flytja fólk frá Manhattan, það er búið að loka nær öllum fyrirtækjum, hlutabréfamörkuðum.

Einnig er farið að gera varúðarráðstafanir í öðrum borgum, það er verið að koma fólk úr öllum stærri byggingum í Chicago.

Einnig hefur verið tilkynnt um eld í Washington Mall, sem er miðhluti Washington D.C.

52 Orð | Ummæli (0) | Flokkur: Dagbók

Update

september 11, 2001

Nú segja menn að báðar flugvélarnar hafi verið fullar af fólki. Önnur frá Boston. Þeim var báðum rænt og klesstu fullar af fólki á World Trade Center.

Nú eru líka fréttir af því að flugvél hafi klesst á Pentagon, varnarmálaráðuneytið í Washington D.C.

Það er verið að koma fólki burtu frá Washington D.C.

Þetta er hræðilegt!

56 Orð | Ummæli (0) | Flokkur: Dagbók

Hryðjuverk

september 11, 2001

Þetta eru alveg svakalegar fréttir. Allir bandarísku netmiðlarnir eru niðri, það er ekki glæta að komast á CNN.com. Við hérna í vinnunni erum þó að hlusta á útvarpið og þar eru menn að nokkuð vissir um að þetta séu hryðjuverk, þar sem menn halda að annarri flugvélinni hafi verið rænt fyrir nokkrum klukkutímum. Þetta er rosalegt.

57 Orð | Ummæli (0) | Flokkur: Dagbók

EOE.is:

Blaður um hagfræði, stjórnmál, íþróttir, netið og mín einkamál.

Á þessum degi árið

2005 2004 2003 2000

Leit:

Síðustu ummæli

Gamalt:



Ég nota MT 3.33