Ég er mjög sammála þér hérna. Mér hefur einhverra hluta alltaf verið illa við Steingrím Joð, finnst hann jafnan skjóta yfir markið jafnvel þótt málstaðurinn sé góður. Það að kalla Davíð “druslu” í pontu í þingsal hjálpar ekki málstað þeirra sem eru á móti þessari hringavitleysu forsætisráðherrans.

En nú ber annað við. Af tvennu illu þá held ég að ég myndi frekar vilja sjá Steingrím Joð komast til valda en að hafa Davíð og lærisveinana tólf áfram við völd. Steingrímur Joð trúir þó á málstað sinn, sem stjórnast ekki af hroka eða hleypidómum heldur af almennri löngun til að gera það sem hann telur vera í bestu þágu þjóðarinnar.

Það sjá svosum allir í gegnum þetta dæmi hjá Davíð & Co. Þeir draga frumvarpið til baka og reyna að fara einhverja bakdyraleið að þessu af því að þeir vissu vel sem var að ef þetta færi í þjóðaratkvæðagreiðslu þá hefði þetta fjölmiðlafrumvarp líklega hlotið einhverja verstu kosningu sem sögur fara af. Það hefði semsagt ekki verið samþykkt, svo ekki sé meira sagt.

Og þá hefði ríkisstjórnin setið í súpunni. Frumvarp, sem þing er búið að samþykkja, en er síðan synjað af hálfu forseta og þjóðarinnar, lýsir greinilegu vantrausti af hálfu þjóðarinnar gagnvart störfum meirihluta Alþingis. Og þá hefði aðeins eitt verið til ráða og það er að leysa upp þingið og boða til þingkosninga. Sem Sjálfstæðis- og Framsóknarflokkarnir hefðu skíttapað vegna þeirrar óánægjuöldu sem skapast hefur í kjölfar þessa skrípaleiks síðustu 2 mánuði.

Þannig að þeir ákváðu, í stað þess að gera hið göfuga og játa að þeir hefðu unnið í óþökk þjóðarinnar og draga frumvarpið alveg til baka, eða a.m.k. leyfa því að fara til þjóðaratkvæðis, þá ákváðu þeir enn og aftur að gera það sem þjónar þeirra hagsmunum og engu öðru. Þeir kusu að reyna í örvæntingu að bjarga eigin skinni. Og þykjast því ætla að gera breytingar á frumvarpi sem þeir voru þegar búnir að samþykkja með meirihluta - og þar með gefa til kynna að þeir væri ánægðir með það í núverandi mynd.

Þetta er orðið svo rotið og fáránlegt mál að það hálfa væri nóg. Ég hef kosið í fjórum kosningum, kaus Samfylkinguna í þeim fyrstu árið og svo Sjálfstæðisflokkinn þar á eftir. Þá kaus ég Sjálfstæðisflokkinn aftur á síðasta ári (í Hafnarfirði, nota bene, þar sem Samfylkingin er alveg glötuð!) en nú er ég reiðubúinn að kjósa allt annað en Sjálfstæðisflokkinn og/eða Framsóknarflokkinn … til þess eins að hjálpa til við að koma þessum egómanísku vitleysingum frá völdum.

Og varðandi fráhvarf Davíðs sem forsætisráðherra: trúir því virkilega einhver að hann dragi sig í hlé? Ég trúi því þegar það gerist … og jafnvel þótt hann stígi niður og geri Halldór að ráðherra þá mun hann finna einhverja leið til að stjórna þessu á bakvið tjöldin. Hann þrífst á völdum, meir en nokkur annar stjórnmálamaður síðustu áratugina, sem hefur hingað til gert hann að besta stjórnmálamanni síðustu ára á Íslandi en er núna farið að koma honum í koll.

Hann fer kannski úr embætti forsætisráðherra en hann lætur aldrei af stjórn. Sannið til!

Já, ég get ekki lengur hugsað mér að hafa Sjálfstæðisflokk eða Framsóknarflokk í ríkisstjórn. Ég held hreinlega að það besta við þetta land sé að fá stjórn Vinstri-Grænna og Samfylkingar. (ég trúi varla að ég sé að skrifa þetta!)

Ekki vegna þess að þessir tveir flokkar séu með stefnumál, sem samrýmast mínum skoðnunum (ég er ósammála ansi mörgum stefnumálum VG), heldur einfaldlega vegna þess að valdhrokinn í þessum 2 ríkisstjórnarflokkum er orðinn svo hræðilegur. Það eina, sem getur bjargað þessum mönnum er að almenningur taki af þeim völdin í næstu kosningum.

Sem eru eftir heil TVÖ ár. Úffff

Raunar tvö ár og 10 mánuði. Því miður.

…bara annar dagur í sandkassanum. Skyldi Dóri bera gæfu til að hætta að éta sand og fara í rólurnar? Einhvern veginn efast ég um það.

Fyrirtæki með svona yfirstjórn og engan pending með viti til að taka við, bara gutta sem segja það sem þú vilt heyra þar til þeir eru komnir undir pilsfaldinn á forstjóranum, myndi ekki eiga glæsta framtíð.

Úff…