Stöð 2

Það kemur mér dáilítið á óvart hvað Stöð 2 er afskaplega slöpp þessar vikurnar. Reyndar er ég ekki með afruglara, en ég hef skoðað dagskrána. Flestir vilja sjá góða bandaríska þætti og finnst mér dálítið skrítið að stöðin skuli ekki leggja meiri metnað að næla í þá þætti, sem eru vinsælir í Bandaríkjunum. Síðasta vetur í Bandaríkjunum voru það svona 5-6 þættir, sem stóðu uppúr í vinsældum og umtali. Þar var aðuvitað fyrstur Who wants to be a millionaire á ABC, sem er snilld og missti ég varla af einum einasta þætti.

Síðan voru það Sex and the City og Sopranos á HBO og síðast Survivor á CBS. Núna hefur Skjár Einn nælt í Survivor og RÚV (af öllum aðilum) nælt í Sex and the City og Sopranos , sem flestir eru sammála um að séu tveir bestu þættirnir. Hvað gerir Stöð 2 eiginlega við allan peninginn, sem þeir fá í áskriftartekjur?

Cuba si, yanqui no!

Geir skrifar mjög góða grein á síðuna sína í dag. Ég var líka staddur á þessum sömu mótmælum en hafði mig svo sem ekki mikið í frammi. Ég man m.a. eftir ágætri ræðu, sem Steingrímur J. Sigfússon hélt á Ingólfstorgi. Ég var þó lítið fyrir að hrópa slagorð. Lét aðra um að hrópa “Cuba si, yanqui no!”. Annars hélt ég því alltaf fram að kallinn með háþrýstidæluna hefði verið pantaður af bandaríska sendiráðinu til að gera lítið úr mótmælunum. Á endanum var þó einhver, sem tók dæluna úr sambandi. Mig minnir að það hafi verið félagi Erpur (Johnny National).

Tres Locos

Ég fór á Tres Locos í gær. Það er ekki góður veitingastaður. Í fyrsta lagi þurftum við að bíða í 50 mínútur eftir matnum. Maturinn var ekkert spes. Svo þegar við vorum enn að borða byrjuðu starfsmennirnir að taka saman hin borðin og henda þeim út á götu. Svo opnuðu þeir hurðina uppá gátt, svo við vorum að frjósa úr kulda. Æji, ég er nú ekki mikið fyrir að kvarta svona, en mikið ofboðslega var þetta nú slappt.

Þjálfari

Þjálfarinn í háskólaliðini mínu í körfubolta er hættur. Hann tók að sér starf, sem aðstoðarþjálfari New York Knicks. Ætli þetta sé ekki bara ágætt fyrir skólann minn, þar sem körfuboltaliðið gat ekki neitt á síðasta tímabili.

Dauft

Það virðist ekki vera mikið að gerast á netinu í dag, enda veðrið frábært. Ég er núna í matarhléi, er aðeins að reyna að vinna í dag. Seinna í dag fer ég svo auðvitað á landsleikinn. Það verður stuð.

Photoshop ofnæmi

Ég er búinn að fá svokallað Photoshop ofnæmi. Það felst í því að í hver skipti, sem ég sé Photoshop augað stara á mig á stikunni þá fæ ég hroll. Þegar ég verð stór ætla ég að finna upp tæki, sem gerir músina óþarfa.

Stórkostlegt

Stórkostlegt, ég er kominn með íslenska dagsetningu á bloggið mitt. Ég þakka Gunna fyrir hjálpina.

Ég var að lesa grein á Jakobi Nielsen, þar sem hann talar um póstlista. Ég veit fátt leiðinlegra en þegar maður fær einhvert fjöldaemail, sem maður getur ekki afskráð sig af. T.d. er einhver netverslun, sem sendir mér reglulega póst. Neðst á hverju bréfi eru leiðbeiningar um það hvernig maður skuli skrá sig af listanum. Maður þarf að fara á ákveðna síðu, stimpla þar inn notendanafn og lykilorð (sem ég er löngu búinn að gleyma) og svo að afskrá sig. Arrgghhhh!!! Ég er dæmdur til að fá póst frá þessu fyrirtæki þangað til að það fer á hausinn.