Ó nei!

Það er ótrúlegt hvað maður er fljótur að gleyma öllum góðu hlutunum þegar Liverpool tapar. Ég horfði á leikinn í dag og það var hörmung. Ég hefði frekar átt að eyða tímanum í að skera papriku á Serrano.

Mér finnst reyndar Liverpool alltaf tapa á Riverside. Ef ég man rétt, þá fékk Westerveld boltann í gegnum klofið í 1-0 tapi þar fyrir 2 árum. Nú var það Dudek, sem gerði mistök (reyndar fyrstu afdrifaríku mistökin, sem ég hef séð hann gera).

Það magnaðasta við þetta allt er dýrkun Gerard Houllier á Emile Heskey. Hann var á kantinum allan leikinn og gat ekki neitt. Ég var farinn að hrópa á Milan Baros en Houllier setti hann ekki inn fyrr en Liverpool voru komnir undir 5 mínútum fyrir leikslok. Ég vona að þetta verði ekki einn af þessum hrikalegu mánuðum fyrir Liverpool. Síðustu tímabil hafa þeir unnið alla leiki 8 mánuði ársins en svo tekið einn mánuð fyrir og tapað hreinlega öllu. Ef þeir forðast slíkan mánuð, þá verða þeir meistarar.

Jæja, ég verð því víst bara að drekka sorgum mínum og rölta svo niður í miðbæ.