Category: Tækni

Vó vó vó vó vó!!!

Hérna mitt í ömurlegu flensukasti með fylgjandi leiðindum fékk ég sendingu með nýjum minniskubb í [tölvuna mína](http://www.lowendmac.com/imacs/g5-2005.html). Ég gat því aukið minnið úr 1GB í 2GB. Munurinn er stórkostlegur! Yndislegur! Ótrúlegur! Magnaður! Ég get kveikt á öllum forritunum í dock-inu og samt sé ég aldrei fokking djöfulsins andskotans strandboltann. Þetta er svo æðislegt að ég trúi því ekki.

Svo þarf líka ekki mikið til að gleðja mig eftir að hafa legið hérna heima í 4 daga í sjálfsvorkunn.

---

Og vá vá vá vá! Vissuði að Paris Hilton er búin að gefa út plötu? Mér finnst þetta alveg magnað. Hvaða útúrkókuðu geðsjúklingar eyða pening í svona vitleysu.

Magnað.

Já, og fyrir áhugamenn um bandarísk stjórnmál, þá er þetta [magnað myndbrot](http://mediamatters.org/items/200607060011). Það er ekki oft sem maður sér fyrirlitninguna skína jafn augljóslega úr augum þáttastjórnenda.

Nýji síminn minn er algjört æði. Eini gallinn er að hringitónarnir eru allir óþolandi. Þar sem að ég gleymi oft símanum á skrifborðinu inní vinnu, þá vil ég hafa tón, sem gerir starfsfólkið þar ekki geðveikt.

Veit einhver hvar ég get fundið .MP3 hringitóna, sem eru bara einfaldir. Einföld hringing, ekki einhver brjáluð lög með flautum og látum. Ég hef prófað að hafa gott lag sem hringitón, en ég kann best við að hafa bara einfaldan tón. Hins vegar þá finn ég ekkert svo einfalt á netinu.

---

Einnig, ef þú ert vinur minn og átt heima í símaskránni í símanum mínum. Málið er að gaurarnir hjá Samsung umboðinu eyddu allri símaskránni minni og ég er því í djúpum skít varðandi símanúmer vina og kunningja. Ég man svona 2 númer hjá vinum mínum, en öll önnur númer man ég ekki. Er búinn að finna flest vinnu símanúmerin, en er of latur til að leita upp öll vinanúmer.

Þannig að ef þú ert vinur minn eða kunningi og veist að þú átt að vera í símaskránni minni, sendu mér email á einarorn ( @ ) gmail.com. Mig vantar sem flest gsm og heimanúmer. Vantar til að mynda öll númer hjá stelpunum í mínum vinahóp.

Já, ég veit að ég á ekki að nota þessa síðu fyrir smá-auglýsingar.

En allavegana, mig vantar ódýran prentara. Sjá auglýsinguna [mína hér](http://www.apple.is/umraedur/viewtopic.php?p=60944#60944). Væri ágætt ef þetta væri svart/hvítur laser, en er svo sem opinn fyrir öllu.

Einsog glöggir lesendur hafa tekið eftir, þá hefur mig [langað í nýjan síma](https://www.eoe.is/gamalt/2005/06/14/23.21.24/) í talsverðan tíma. Jæja, í dags varð loksins af því að ég fékk nýjan síma

Ég hafði verið spenntastur fyrir Morotola Razr, en eftir að ég spjallaði [við netkærustuna mína](http://www.katrin.is), þá ákvað ég að kíkja á nýja Samsung símann. Og eftir smá pælingar, þá skellti ég mér á [Samsung E730](http://nordic.samsungmobile.com/eng/mobile_phone/sgh-e730/feature.jsp). Ég hef átt [E700 típuna](http://www.mobile-review.com/review/samsung-e700-en.shtml) í nærri tvö og var orðinn virkilega ánægður með Samsung. Ég varð að fá mér clam-shell síma og það virðist vera sem að Samsung séu með bestu línuna í þeim símum.

Allavegana, [nýji síminn](http://nordic.samsungmobile.com/eng/mobile_phone/sgh-e730/feature.jsp) minn er **yndislegur**. Hann hefur allt, sem mig hefur vantað. Hann lagar gallana í gamla símanum og bætir við alls konar dóti, sem ég vissi ekki að ég hefði nokkra þörf fyrir – og þrátt fyrir það er hann minni og léttari síminn minn. Ég á eftir að redda mér Bluetooth tengi fyrir Makkann minn til að sjá almennilega hverng myndirnar úr símanum koma, en mér sýnist þær vera virkilega skýrar og góðar. Svo tekur hann líka upp vídeó, sem mér finnst stórkostlega magnað og núna fæ ég öll mörkin með Liverpool send í símann.

Er ekki tæknin yndisleg? Ég elska ný tæki!

---

Já, og ég fæ gæsahúð þegar ég heyri byrjunina á Hoppípolla. Sigur Rós er æði!

Ég hef spilað Grand Theft Auto: San Andreas allmörgum sinnum. Í þeim leik hef ég t.a.m.

* Drepið fólk með sveðju
* Drepið hóp af skólakrökkum með handsprengju
* Lamið gamlar konur til óbóta
* Keyrt yfir hóp af túristum á skriðdreka.

Allt þetta og meira var mögulegt í leiknum. Hins vegar þá hefur hann hingað til ekki verið algjörlega bannaður börnum. Leikurinn var einungis bannaður 17 ára og yngri.

Núna hefur hins vegar verið ákveðið að banna leikinn innan 18 ára. Er það vegna þess að það er hægt að drepa gamlar konur með vélsög? Neibbs. [Ástæðan er að núna er hægt að sjá ber kvenmannsbrjóst í leiknum](http://www.usatoday.com/tech/products/games/2005-07-20-gta-sex_x.htm).

Jamm, fólk er fífl.

[iTunes 4,9](http://www.apple.com/itunes) kom út í gær. Það merkilegasta við þessa útgáfu er að iTunes styður núna [Podcast](http://www.apple.com/podcasting/), sem er einmitt algjör snilld!

Beisiklí, þá eru Podcasts bara Mp3 skrár með ýmsu efni. Oftast gengur þetta þannig fyrir sig að maður finnur ákveðið efni í iTunes, einsog til dæmis bandaríska útvarpsþætti og gerist áskrifandi að þáttunum. Til dæmis gerðist ég í morgun áskrifandi að “The Al Franken Show”, sem er snilldarþáttur. Um leið og ég hef gerst áskrifandi, þá nær iTunes sjálfkrafa í nýjustu þættina á hverjum degi og setur þá líka á iPod-inn minn.

Þannig að á hverjum degi fæ ég fullt af skemmtilegu nýju efni inná iPod-inn minn, án nokkurrar fyrirhafnar (nema að þetta er erlent niðurhal). Í dag er hægt að velja á milli um 3000 Podcasts með alls konar efni, frá íþróttum til pólitískra spjallþátta og fræðsluþátta.

Þetta er snilld. Snilld, segi ég og skrifa!

Fokk, mig er farið að langa í nýjan síma!

Ég hef með ágætu móti getað bælt þessa stanslausu löngun mína í ný tæki í smá tíma. Keypti mér [svona síma](http://www.mobile-review.com/review/samsung-e700-en.shtml) fyrir 16 mánuðum af því mér fannst hann svo ógeðslega flottur á þeim tíma. Með einhverjum ráðum hefur mér tekist að eiga þennan síma í 16 mánuði, sem er sko stórkostlegt nýtt met því ég er vanur að týna eða eyðileggja síma á svona 6 mánuða fresti.

Allavegana, ég hef verið nokkurn veginn í rónni þangað til að ég sá auglýsingu fyrir [MotoRazr](http://direct.motorola.com/ens/web_producthome.asp?Country=USA&language=ENS&productid=29302). Hólí fokk, hvað það er flottur sími. Finn hjá mér alveg óstjórnandi þörf fyrir því að eignast svona síma núna strax. Er fullviss um að líf mitt verði innihaldsríkara bara ef ég kaupi mér svona síma.

Ég var reyndar búinn að sjá þetta fyrir. Fyrir svona tveim vikum (áður en ég sá auglýsinguna, nota bene), þá missti ég símann minn í gólfið inní vinnu. Hann smallaðist í nokkra bita, en mér tókst að setja hann saman aftur. Það virkaði ágætlega fyrstu vikuna, en núna er einsog síminn minn sé með fokking holdsveiki. Hinir ýmsu hlutir detta af honum í tíma og ótíma. Í dag datt tildæmis volume takkinn af og núna get ég ekki stjórnað því hversu hátt fólk talar í símann við mig, heldur verð ég actually að biðja fólk um að tala hærra eða lægra. Sem er ekki gott.

En það myndi allt lagast með þessum [nýja síma](http://direct.motorola.com/ens/web_producthome.asp?Country=USA&language=ENS&productid=29302). Hann er svo flottur að ég verð beinlínis að fá fólk til að hringja í mig með reglulegu millibili á laugardagskvöldum, svo ég get tekið hann upp og talað í hann á Oliver, Hverfis eða hvaða stað sem ég verð á. Ég er viss um að stelpurnar eiga eftir að fríka út þegar þær sjá mig tala í þennan síma. Þar sem ég keyri um á þriggja ára gamalli Almeru, þá get ég ekki sjarmerað stelpur með flottum bíl. En ég á þá allavegana flottan síma.

Jamm, líf mitt verður skemmtilegra, fjölbreyttara og meira spennandi ef ég kaupi þennan síma.

Eða hvað? Er þetta kannski drasl sími? Talar einhver af reynslu?

[Þetta](http://bicillin.media.mit.edu/clocky/) er einhver magnaðasta uppfinning seinni tíma.

Starfsmaður hjá MIT hefur hannað nýja tegund af vekjaraklukku. Klukkan inniheldur hjól og nemur hreyfingar. Hún virkar þannig að þegar þú ýtir á Snooze takkann, þá rúllar klukkan sér af náttborðinu og rúllar sér svo um herbergið. Þegar hún svo hringir í annað skiptið, þá er hún kominn á allt annan stað og þú þarft að standa upp og leita að henni til að slökkva á henni.

Snilld! Ég *þarf* eintak. (via [MeFi](http://www.metafilter.com/mefi/40797))

Einsog allir vita eru Apple tölvur bestu tölvur í heimi. Stýrkierfið er einfaldara, fallegra og skemmtilegra en Windows og auk þess færðu aldrei vírusa, spyware eða annað óskemmtilegt drasl.

Allavegana, ég var að uppfæra yfir í nýjan iMac, sem er algjört æði, en af því leiðir að gamla tölvan mín er til sölu. Ég ætla að selja hana ódýrt og því er þetta kjörið tækifæri fyrir þá, sem vilja færa sig frá hinni illu hlið PC tölva yfir í Apple. Það er líka löngu sannað að við Apple notendur erum einstaklega gáfað fólk, þannig að þarna geturðu með einföldu skrefi hækkað greindarvísitölu þína umtalsvert 🙂

En án gríns, þá er ég semsagt með gömlu tölvuna mína til sölu. Þetta er þessi tölva: Power Mac G4 (n.b. ekki skjárinn á myndinn). Vélin er með 768 MB vinnsluminni, 72GB hörðum disk og Airport þráðlausu netkorti. DVD innbyggt en geisladiskabrennari er utanáliggjandi

Einnig fylgir með 17″ skjár. Allt í fínu standi, nema að lyklaborðið er orðið dálítið ljótt eftir mikla notkun. Það má þau auðveldlega hreinsa 🙂

Tilboð óskast. MSN: einarorn 77 (@) hotmail.com eða í gegnum email á einarorn (@) gmail.com

Nota bene, ég er búinn að eiga þessa tölvu í fjögur ár og hún hefur ALDREI bilað. Þetta er mikill gæðagripur, sem hefur reynst mér vel. Í stýrkierfinu fylgir m.a. frábært póstforrit og svo iLife, sem eru frábær Apple forrit, sem gera þér auðvelt að klippa til vídeómyndir eða skipuleggja digital ljósmyndir.

**Uppfært**: Búinn að selja tölvuna!

Jæja, ég er búinn að eignast nýja tölvu. Það eru viss stórtíðindi, þar sem gamla heimilstölvan var orðin meira en 4 ára gömul.

Gamla tölvan, sem var Apple Powermac G4 var orðin dálítið lúin, þrátt fyrir að hún hafi **aldrei** bilað. Hún var hins vegar orðin hæg í sumum vinnslum og ákvað ég að uppfæra.

Nýja tölvan mín er **fallegasta tölva í heimi**, [iMac með 20 tommu skjá](http://www.apple.com/imac/design.html). Öll tölvan er inní þessum æðislega skjá. Ég er alveg í skýjunum yfir þessari nýju tölvu (sjá mynd).

Núna hef ég loksins ekki afsakanir fyrir því að fresta ýmsum verkefnum, sem ég var búinn að taka að mér og er núna að uppfæra nokkra vefi, sem ég hef umsjón með. Er með dúndrandi hausverk, sem ég er búinn að vera með í allan dag, en reyni að láta það ekki hafa of mikil áhrif á mig. Þessi hamingjusvipur á myndinni er því frekar mikil tilgerð hjá mér, enda er ég alveg hræðilega þreyttur 🙂