Vá, enn ein færslan um baseball. Ég verð að fara að hætta þessu, þar sem svona fimm Íslendingar hafa áhuga á þessari íþrótt.
Allavegana, þá er ég eftir vinnu að fara á leik. Hildur er að læra undir próf, þannig að við Dan ætlum að skella okkur á leik með Chicago Cubs á móti Cincinnati Reds. Með Reds leikur einmitt hinn ágæti Ken Griffey Jr. Annars er meistari John Lieber að kasta fyrir Cubs, þannig að ég hef engar áhyggjur.
Þar hafiði það!
Þetta er athyglisverður listi fyrir alla knattspyrnuáhugamenn.
Það er búið að vera magnað að fylgjast með bresku knattspyrnusíðunum í dag. Mest lætin eru í kringum markvaraðakaup Liverpool.
Þetta virðist allt hafa endað með því að Liverpool eru búnir að kaupa TVO markverði. Bæði Jerzy Dudek, markvörð pólska landsliðsins og Chris Kirkland, markvörð enska 21-árs landsliðsins, og er Kirkland orðinn dýrasti enski markvörður allra tíma.
Þetta eru sannarlega ótrúlegar fréttir. Ég hef alltaf staðið við bakið á Sander Westerveld, aðalmarkverði Liverpool og tel ég hann vera næst besta markvörðinn í ensku deildinni (á eftir van der Saar) en Houllier virðist ekki alveg vera sammála mér. En Houllier hefur nú oftast rétt fyrir sér, þannig að maður treystir honum.
Það eru eflaust margir, sem hafa áhuga á endurkomu Michael Jordan. Fyrir þá, sem vilja fylgjast vel með í þeim málum vil ég benda á tvo afbragðs pistlahöfunda, sem skrifa fyrir tvö stærstu dagblöðin hér í Chicago.
Þeir eru Sam Smith, sem skrifar fyrir Chicago Tribune og Lacy Banks, sem skrifar fyrir Chicago Sun-Times. Báðir þessir blaðamenn skrifa um körfubolta og er Lacy Banks sérstaklega mikill áhugamaður um endurkomu Jordan.
Jordan æfir á hverjum degi hér í Chicago, en hann býr ennþá í borginni, þrátt fyrir að vinnan hans sé í Washington D.C.
Mjög sniðug þessi nýja stefna í leikmannakaupum hjá Manchester United. Í fyrsta lagi þá var það augljóst að vörnin var veikasti hlekkurinn hjá liðinu og því ákvað framkvæmdstjórinn að selja besta varnarmanninn til Lazio.
Í öðru lagi virðist það vera ný stefna hjá liðinu, að þótt menn vilji ekki ganga til liðsins, þá heldur Ferguson bara áfram að reyna alveg þar menn eru orðnir of gamlir fyrir sitt lið´.
Þannig gerðist þetta með Laurent Blanc. Hann var búinn að hafna Man United þrisvar sinnum áður. Núna í dag er hann orðinn 35 ára gamall (8 árum eldri en besti varnarmaður á Englandi) og kemst ekki í liðið hjá Inter Milan. Hann var því sennilega feginn þegar honum bauðst að koma til United.
Það er spurning hvort Man United haldi þessari stefnu áfram. Kannski geta þeir þá keypt Rivaldo þegar hann er orðinn fimmtugur.
Ég veit að það eru ekki margir Íslendingar, sem hafa áhuga á hafnabolta. Flestir halda að þetta séu allt einhverjir feitir gaurar, sem geti ekki hlaupið, en það er auðvitað vitleysa. Þetta er mjög skemmtileg íþrótt að horfa á í sjónvarpi og það jafnast ekkert á við það að fara á leiki á völlum einsog Wrigley Field, sem er heimavöllur míns uppáhaldsliðs, Chicago Cubs.
Með Cubs leikur einmitt minn uppáhaldsleikmaður, Sammy Sosa, sem er alger snillingur. Gott dæmi um snilli hans er hér. Sammy Sosa er frá Dómínaska Lýðveldinu, en hafnabolti er einmitt vinsælasta íþróttin á flestum eyjunum í Karabíska hafinu. Sosa er leikmaður, sem getur í raun klárað leik á eigin spýtur en þrátt fyrir það er hann alltaf alveg einstaklega hógvær. Það er erfitt að finna betri og skemmtilegri íþróttamann.
Hristo Stoichkov var einn af mínum uppáhaldsleikmönnum, þegar hann lék með Barcelona. Hann leikur núna með Chicago Fire, sem er besta liðið í MLS, bandarísku atvinnudeildinni. Ég og Hildur fórum á leik með þeim fyrir nokkru, en fyrir leikinn gat fólk fengið að taka myndir með uppáhaldsleikmönnum sínum.
Ég náttúrulega fékk að taka mynd með Stoichkov, en hann var mjög sáttur þegar hann sá að ég var mættur í Barcelona búning.
Lang skemmtilegustu pistla um fótbolta, sem ég hef lesið, skrifar Paul Tomkins á síðunni BootRoom. Þessi síða er tileinkuð Liverpool, sem er einmitt besta lið í heimi.
Allavegana, þá mæli ég með þessum pistlum fyrir alla. Nýjasti pistillinn fjallar um leikinn um Góðgerðarskjöldinn.
Ég var að komast að því að það er búið að setja af stað atvinnu knattspyrnudeild fyrir konur hérna í Bandaríkjunum. Hins vegar myndi ég ekki hafa hugmynd um þessa deild ef ekki væri fyrir morgunblaðið á netinu. Þeir flytja reglulega fréttir af deildinni, þar sem einhverjar íslenskar stelpur leika í deildinni.
Ég hef hvorki heyrt, lesið né séð neitt um þessa deild í bandarískum fjölmiðlum, samt les ég daglega íþróttasíður Chicago Tribune og horfi á SportCenter. Fyndið hvað Morgunblaðið gerir mikið úr þessari deild, miðað við áhuga innfæddra.
Þetta kalla ég sko góðar fréttir.