Category: Tækni

Nýr æPod

Það er búið að opinbera nýja iPod-inn. Steve Jobs er í viðtali við Newsweek og þeir láku forsíðunni í gær.

Sjá [hér á engadget](http://www.engadget.com/entry/8424310331131743/)
Einnig hér er Newseek greinin: [The new iPod](http://www.msnbc.msn.com/id/5457434/site/newsweek/)

Svo sem engar byltingar, en hann er með 12 tíma batteríi (í stað 8), takkarnir 4 eru farnir og þess í stað er bara hjólið. Svo virðist stýrikerfið í spilaranum sjálfum aðeins vera breytt. Já, og svo eru þeir allir 100 dollurum ódýrari, sem þýðir væntanlega að þeir eru um 10.000 krónum ódýrari í Apple búðinni. Verða bara til í 20gb og 40gb.

**Uppfært**: [Hérna er öll Newsweek greinin](http://msnbc.msn.com/id/5457432/site/newsweek) um iPod og gríðarleg áhrif og vinsældir þessa litla tækis.

Ég og iPod-inn minn

ipod45.jpgNúna er talið að Apple, yndislegasta tölvufyrirtæki muni [kynna nýja gerð af iPod í næsta mánuði](http://www.thinksecret.com/news/augustipods.html). Núverandi iPod-ar rúma 40GB af tónlist, en talið er að þeir nýju muni rúma allt að 60GB. Einnig er talið að þeir verði minni og fáanlegir í mörgum litum.

Núna er spennandi að sjá hvort að nýji iPod-inn verði nógu spennandi til þess að ég verði fársjúkur, reyni að selja iPod-inn minn og verði svo ekki í rónni fyrr en ég hef keypt mér einn af þessum nýju. Ég er nefnilega tækjasúkur.

Ég elska líka iPod-inn minn.

Ég elska hann, sennilega jafn heitt og hægt er að elska rafmagnstæki. Hann er ómissandi hluti af mínu lífi. Hann heldur mér á lífi í ræktinni og ég get varla hugsað mér ferðalög án þess að hann sé með í för. Ég hef átt hann í ár og það er hreint með ólíkindum að hugsa sér hversu miklu hann hefur breytt. Þetta litla [tæki](http://www.apple.com/ipod/) er æði.

Mac Safari

Þá er MacWorld búinn og því miður rættist ósk mín um nýjan iPod ekki. Það verður því einhver töf á því að ég fjárfesti mér í slíkum grip.

Apple kynntu hins vegar alveg svakalega flotta 17 tommu Powebook fartölvu. Það er hreint með ólíkindum stór skjár fyrir fartölvu. Einnig kynntu þeir pínkulitla 12 tommu fartölvu.

Einnar merkilegasta tilkynningin var sú að Apple hefur gefið út nýjan browser, sem ber heitið Safari. Það hefur nú síðastu mánuði (eftir að OSX Jagúar kom út) verið helsti gallinn við Apple að allir browserar fyrir mac eru mun lélegri en Microsoft Explorer fyrir PC. Nú vonandi verður breyting á.

Safari er enn sem komið er í Beta útgáfu en hann lofar góðu. Ég er auðvitað byrjaður að nota þennan browser og þessi færsla er skrifuð í honum. Útlitslega þá er einfaldeikinn í fyrirrúmi, sem er gott. Safari virðist keyra síður mjög hratt og hann gerir það nokkuð vel (betur en til dæmis Netscape). Allar mínar nýju síður koma bara nokkuð vel útúr honum og þessi síða virðist koma alveg einsog ég ætlaði. Eina vandamálið sem ég sé er að hún höndlar iframe ekki nógu vel, þannig að rss yfirlitið mitt verður pínkuponsu bjagað.

Annars eru hérna umræður á Metafilter um MacWorld. Hér eru svo pælingar Menu Trott, Movabletype sérfræðings (og mac notenda) um Safari. Hún vísar svo á frekari umfjallanir um þennan nýja browser.

p.s.Ég var að bæta inn bookmarks í þennan nýja browser. Þá komst ég að titillinn á hinni ágætu heimasíðu Íslandsbanka er eftirfarandi:

Isb.is – Íslandsbanki á netinu – Alhliða fjármálaþjónusta s.s. bankaviðskipti, lán, verðbréf, fjármál, viðskipti, sparileið, verðbréfareikningur, framtíðarreikningur, georg, menntabraut, fríkort, valkort, vildarþjónusta, netgreiðsla, eignastýring, fasteignir, banki, þjóðskrá, gengi, lán, verðbréf, hlutabréf, bílalán, gjaldeyrir, tékkar, kreditkort, debetkort, yfirdráttur, víxill, alvíb, lífeyrissparnaður, lífeyrir, greining, netbanki, heimabanki, ergo, vib, glitnir, isl, isbank, xy, félagabanki, iceland, bank, stock, currency, bankaútibú, hraðbanki, hraðbankar, uppleið, hlutdeild, heiðursmerkið, bílar, húslán, skuldabréf, hlutabréfasjóðir

Er ekki allt í lagi með fólk? Á þetta ekki heima í meta upplýsingum?

Apple – Switch

Uppáhaldstölvufyrirtækið mitt, Apple er að byrja með nýja auglýsingaherferð. Áður var slagorðið “Think Different”, en núna er það einfaldlega Switch.

Þessi auglýsingaherferð á aðallega að höfða til Windows notenda til að hvetja þá til að skipta yfir í Mac. Það verður fróðlegt að sjá hvort þetta virki.

Apple búð

Á laugardaginn fórum við Hildur í Woodfield verslanamiðstöðina en þar var einmitt verið að opna Apple búð. Þessi búð er sú fimmta í röðinni af búðum, sem Apple er að koma upp í stærstu borgum Bandaríkjanna. Þeir álíta þetta mikilvægt skref í að ná stærri markaðshlutdeild.

Þegar við komum að búðinni var biðröð fyrir utan og þurftum við að bíða í um korter eftir því að komast inn, en hleypt var inn í hópum. Búðin er mjög flott. Einsog allt frá Apple var hönnunin á búðinni afskaplega einföld og smekkleg. Við skoðuðum þarna nýjustu tölvurnar og horfðum á kynningar fyrir mörg skemmtileg forrit einsog iMovie og iDVD.

Það má ætla að flestir, sem hafi verið á staðnum fyrsta daginn hafi, einsog ég, verið Mac notendur. Hins vegar má áætla að í framtíðinni muni margir PC unnendur heillast af Mac tölvum eftir heimsókn í þessar búðir, því fólk gerir sér best grein fyrir kostum Mac tölva þegar það fær að prófa þær. Það var einmitt stór kostur við búðina, það er að manni var velkomið að fikta í öllu. Maður gat flakkað um á netinu, eða skoðað stýrikerfið, eða klippt saman myndbúta í iMovie og svo framvegis.