Sumarferðalag um Alpana

Posted on by
Reply

Við fjölskyldan erum að reyna að púsla saman sumarfríinu okkar og á planinu er sumarferðalag um alpana. Það hefur alltaf verið draumur hjá mér að heimsækja austurrísku alpana yfir sumartímann.

Við ætlum að keyra frá Svíþjóð niðureftir og vera í um 3 vikur í kringum alpana og enda hugsanlega við Garda vatn á Ítalíu. Ef þú hefur ferðast á þessum slóðum yfir sumartíma, þá hef ég nokkrar spurningar.

  1. Eru einhverjir staðir í Ölpunum sem þú myndir mæla sérstaklega með? Við höfum áhuga á styttri göngum, fallegu landslagi, að hjóla og einfaldlega slappa af í fallegri náttúru. Við höfum ekki séstaklega mikinn áhuga á að vera í borgum í þetta skiptið. Við verðum með 15 mánaða gamlan son okkar með.
  2. Við ætlum að keyra frá Stokkhólmi til Neuschwanstein kastala í nokkrum þrepum. Eru einhverjir staðir, sem þú mælir með á leiðinni?
  3. Hvernig er Garda vatn? Hvar á maður að gista? Hvað á maður að gera?

Enn sem komið er er ég bara búinn að merkja nokkra staði inná kortið til að fara á: Grossglockner vegurinn, Neuschwanstein kastali, Krimmler fossarnir og Garda vatn. En við höfum 3 vikur og því væri eflaust hægt að fjölga áfangastöðum án þess að vera of stutt á hverjum stað.

Kosningarnar á laugardaginn

Posted on by

Það er kannski til marks um það hversu lélegur bloggari ég er að ég hef ekkert skrifað hér um pólitík í aðdraganda þessara kosninga.

Ég ætla að kjósa Samfylkinguna. Samfylkingin hefur verið í forystusæti í ríkisstjórn, sem hefur að mörgu leyti frábærum árangri á þessu ótrúlega erfiða kjörtímabili. Ég tel afskaplega takmarkaðar líkur á að nokkur annar flokkur hefði náð betri árangri í efnahagsmálum heldur en Samfylkingin hefur náð með aðstoð Vinstri-Grænna. Ágúst Ólafur vinur minn setti þennan ágæta afrekalista inná Facebook:

1. Hagvöxtur hefur verið tvö ár í röð og hefur verið hærri en meðaltal OECD-ríkjanna
2. Kaupmáttur hefur aukist tvö ár í röð og er enn að aukast
3. Verðbólgan er nú einungis þriðjungur af því sem hún var eftir hrun
4. Atvinnuleysi hefur minnkað um tæpan helming frá hruni
5. Halli ríkissjóðs hefur farið úr 216 milljörðum þegar ríkisstjórnin tók við völdum og niður í tæpa 4 milljarða
6. Öll alþjóðleg lánshæfisfyrirtæki hafa sett íslenska ríkið í fjárfestingarflokk
7. Skuldir heimila og fyrirtækja hafa lækkað um 3,000 milljarða eða um næstum 200% af landsframleiðslu á kjörtímabilinu
8. Skuldir heimilanna hafa lækkað um tæp 24% af landsframleiðslu á kjörtímabilinu. Það er meira en 300 milljarða króna lækkun á skuldum heimilanna á kjörtímabilinu.
9. Skuldastaða íslenskra heimila er nú komin niður í það sem hún var árið 2006 sem er talsvert fyrir hrun
10. Skattar eru lægstir á Íslandi af öllum Norðurlöndunum
11. Ísland er í 16. sæti þegar kemur að skattbyrði 30 Evrópuþjóða
12. Skattar hins opinbera er nú um 36% af landsframleiðslu. Skattar voru yfir 40% árið 2007 og skattar voru því hærra hlutfall þegar B og D stjórnuðu síðast.
13. 87% allra launþega eru í milliþrepi tekjuskatts en einungis um 7% eru í efsta þrepinu sem er það skattþrep sem Sjálfstæðismenn ætla að einbeita sér að og vilja helst lækka skatta á
14. Það er rangt að skattar og gjöld hafi stórhækkað verðtryggðar skuldir heimilanna því skuldirnar hafa einungis hækkað um 0,54% vegna áhrifa af sköttum og gjöldum undanfarin þrjú ár
15. Á kjörtímabilinu hefur ríkisstjórnin varið um 100 milljörðum króna í vaxtabætur og barnabætur sem er meira en nokkur ríkisstjórn hefur gert áður
16. Skuldatryggingarálag á ríkissjóð hefur ekki verið jafnlágt frá miðju 2008.
17. Krónan hefur ekki verið sterkari í tvö og hálft ár
18. Ójöfnuður ráðstöfunartekna í landinu er um helmingi minni nú en árið 2007 þegar ójöfnuður varð mestur.

Einsog fyrir síðustu kosningar þá tel ég það eitt mikilvægasta málið fyrir Ísland vera að klára aðildarviðræður við Evrópusambandið. Það er fátt mikilvægara fyrir fyrirtæki í samkeppnisrekstri en að búa við traustan gjaldmiðil. Við það höfum við ekki búið á Íslandi á síðustu árum. Fyrir fyrirtækin eru gjaldmiðilsmálin til að mynda miklu mikilvægari en það hvort skattur á hagnað sé lækkaður um einhver prósentustig. Samfylkingin vill klára viðræður við ESB og stefna að upptöku á evru. Aðrir flokkar og þá sérstaklega B&D skila auðu þegar að kemur að gjaldeyrismálum þjóðarinnar.

* * *

Ef ég skoða málefnin þá finn ég engan stórkostlegan mun á VG, Samfylkingunni og Bjartri Framtíð. Ef þú ætlar að kjósa einhvern þeirra flokka, þá er ég ánægður (og já, líka ef þú kýst Pírata).

Ef þú ætlar hins vegar að kjósa framsókn vegna loforða þeirra og töfralausna þá bið ég þig að hugsa aðeins hvernig fyrri kosningaloforð framsóknar hafa reynst þjóðinni og hvernig þeir gáfu flokksgæðingum fyrirtæki, sem voru áður í sameign okkar allra. Telurðu það réttlætanlegt að gríðarlega háar upphæðir úr sjóðum allra landsmanna fari í það að borga húsnæðisskuldir stóreignafólks á meðan að þeir sem ekkert eiga fá ekki neitt?

Ef þú ætlar að kjósa Sjálfstæðisflokkinn þá bið ég þig um að íhuga hvort að þar fari flokkur sem hafi lært eitthvað af bankahruninu. Telurðu líklegra að eitthvað verði öðruvísi núna? Telurðu líklegt að sá flokkur hafi hagsmuni fólksins í landinu framar hagsmunum LÍÚ?

* * *

Miðað við árangur sem að Samfylkingin hefur náð í ríkisstjórn á síðustu fjórum árum og miðað við það fólk sem flokkurinn teflir fram með Árna Pál í forystu, þá get ég stoltur sagt að ég kýs Samfylkinguna í alþingiskosningunum og ég hvet þig til að gera það líka.


San Pedro de Sula

Posted on by

Hérna er gott myndasafn á Big Picture frá San Pedro Sula í Hondúras. Ég stoppaði stutt við í þeirri borg fyrir 8 árum á ferðalagi mínu um Mið-Ameríku. Þá var borgin þekkt sem sú borg sem hafði hæst hlutfall alnæmis í Ameríku. Í dag er borgin sú borg í heiminum þar sem ofbeldi er verst.

Ef fólki vantar ástæður til þess að nota ekki ólögleg vímuefni þá er ágætt að skoða þessar myndir og sjá hvernig að eftirspurn okkar vesturlandabúa eftir fíkniefnum er að eyðileggja lönd í Mið-Ameríku einsog Hondúras og Mexíkó þar sem að eiturlyfjagengi ráða öllu og beita hvor aðra og almenning ótrúlega grimmilegu ofbeldi án þess að lögreglan geti neitt gert. Þetta er sorglegt ástand.

Zocalo – Fresh Happy Mex

Posted on by

Núna eru 4 ár síðan að við opnuðum okkar fyrsta Serrano stað í Svíþjóð. Á þeim tíma höfum við lært ansi margt og þetta hefur verið oft á tíðum mjög erfitt, en það hefur líka gengið vel og verið ótrúlega skemmtilegt.

Fyrir um ári fórum við að ræða um möguleika á að breyta konseptinu aðeins og taka mið af því sem við höfum lært á síðustu árum. Munurinn á pantanamynstri á milli Svíþjóðar og Íslands er nokkuð mikill. Flestir heima velja sjálfir sinn mat og fólk kemur inná staðinn á mjög breiðu tímabili yfir daginn. Í Svíþjóð panta hins vegar nánast allir af matseðli og gríðarlega stór hluti af gestunum kemur á mjög stuttu tímabili í hádeginu. Þess vegna vildum við breyta því aðeins hvernig við afgreiðum matinn og byggjum upp staðina.

Við höfum líka verið sannfærð um að það sé hægt að gera matinn betri. Í haust ákvaðum við því að veita Alex Sehlstedt, yfirkokkinum okkar, sem gerði líka Nam konseptið með okkur, fullt frelsi til að endurhugsa algjörlega okkar matarkonsept. Hann fékk nokkra mánuði til að hugsa konseptið alveg frá grunni einsog hann myndi vilja hafa það.

Þriðja breytingin sem við veltum fyrir okkur var svo á nafninu Serrano. Síðasta sumar hófum vinnu með Íslensku Auglýsingastofunni til að vera markvissari í markaðsaðgerðum á Íslandi og í Svíþjóð. Við unnum þá vinnu með frábæru fólki á þeirri stofu og ein spurningin sem kom upp í viðtölum við starfsfólk og kúnna í Svíjþóð var um nafnið Serrano. Málið er að þegar að við opnuðum Serrano á Íslandi þá tengdi fólk orðið ekki við neitt sérstakt og því gátum við eignað okkur það á Íslandi. Serrano er nafnið á mexíkóskum chili pipar en í Evrópu er það líka þekkt sem spænsk skinka.

Og það var svo að í Svíþjóð lendum við sífellt í því að fólk heldur að við séum tapas staður. Þetta er vandamál sem við töldum að myndi aðeins aukast eftir því sem við myndum (vonandi) færa okkur sunnar í álfunni.

Því tókum við ákvörðun í október á síðasta ári að skipta um nafn á Serrano stöðunum í Svíþjóð (staðirnir á íslandi munu áfram heita Serrano). Við fórum nokkra hringi með nöfn. Íslenska auglýsingastofan spreytti sig á verkefninu og ég, Emil og yfirstjórnendur í Svíþjóð reyndum okkur líka. Ég fór yfir punktana frá því þegar við ákváðum Serrano nafnið í upphafi og við fórum í gegnum ansi mörg spænsk orð í leit að einhverju sem mér fannst passa við okkar stað. Ég skoðaði laganöfn og heiti á lestarstöðvum og bæjum í Mexíkó. Eitt laugardagskvöldið fékk ég mér bjór á bar hérna í nágrenninu og þar sannfærðist ég um hvað væri rétta nafnið fyrir nýja staðinn.

Eftir smá samtöl við Emil og stjórnendurna í Svíþjóð urðum við sammála um hið nýja nafn.

Zocalo Fresh Happy Mex

Zocalo Fresh Happy Mex

Zocalo er heitið á stærsta torginu í Mexíkóborg. Það er staður þar sem fólk hittir sína vini og fjölskyldumeðlimi, skemmtir sér og borðar góðan mexíkóskan mat. Alveg einsog veitingastaðurinn okkar.

Hér er heimasíða Zocalo og hér erum við á Facebook.

Frá og með 10.apríl munum við því gera breytingar á veitingastöðunum hér í Svíþjóð. Allir munu þeir loka í einhverja daga og þá munum við breyta afgreiðslunni. Á Zocalo pantar fólk við kassa af matseðli, borgar og fær bíper. Um leið og maturinn er tilbúinn þá pípir bíperinn og þú getur sótt matinn hjá eldhúsinu. Þannig forðumst við þær löngu raðir sem hafa myndast í hádeginu á stöðunum hérna úti. Í stað þess að eyða hádeginu í röð þá geturðu beðið í sætinu þínu og spjallað við þá sem þú ætlar að borða með.

Við munum líka breyta ytra útliti staðanna – við málum þá í ljósari litum og lýsum upp staðina. Við bætum inná stærstu staðina stórum listaverkavegg með mynd af Zocalo torgi, máluðu af sænskum listamanni Nina Wennersten.

Zocalo Mural

Zocalo Mural

Matseðilinn mun síðan breytast talsvert. Við gerum réttina einfaldari, tökum suma rétti út, lögum aðra og bætum við nýjum hlutum. Stærsta breytingin er að við bætum við tacos á matseðilinn okkar og einnig flóknari réttum á kvöldin. Staðirnir okkar hafa verið miklir hádegisstaðir en takmark okkar er að fá inn miklu fleira fólk á kvöldin. Því munum við byrja með fajitas og mexíkóska smárétti, sem við bindum miklar væntingar við.

Það er líka mikið að gerast í sjálfu fyrirtækinu okkar. Stærstu fréttirnar er að við erum komin með stóran sænskan fjárfesti með okkur í lið, en það er Gavia Food Holding, sem að átti áður Santa Maria vörumerkið. Það er gríðarlegur styrkur og viðurkenning fyrir okkar vinnu að fá svo sterkan sænskan fjárfesta í lið með okkur.

Við munum einnig á næstu þremur mánuðum opna þrjá frábæra staði í miðbæ Stokkhólms. Það að finna góðar staðsetningar fyrir veitingastaði í miðbæ Stokkhólms er eiginlega ómögulegt. Í þessi fjögur ár hefur ekki liðið sá dagur að ég hafi ekki leitað á einhvern hátt að staðsetningum. Ég hef fundað með ábyggilega vel flestum stórum fasteignaeigendum í Stokkhólmi og skoðað flesta veitingastaði í borginni. Vegna þess hversu sterkur réttur leigjenda er þá er nánast ómögulegt að fá pláss á góðum stað án þess að borga fyrir það mjög háar upphæðir í lyklagjald.

Því eru þessir staðir hreint stórkostlegir fyrir okkar konsept. Það er að vissu leyti tilviljun að allir þessir staðir skuli opna með svo stuttu millibili en allir eiga þeir það sameiginlegt að vera algjörar AAA staðsetningar í miðbæ Stokkhólms. Við opnum fyrst um miðjan apríl á Kungsgatan 25 í nýju food-courti – K25 – þar sem ung og flott veitingastaðakonsept eru samankomin. Auk okkar eru þar Vigårda (sem hin sterka F12 grúppa á), Yoi, Panini, Beijing 8 og fleiri flottir staðir.

Í maí munum við svo opna okkar stærsta og flottasta stað á Klarabergsgatan 29, alveg við Sergels Torg. Meira miðsvæðis er ekki hægt að vera í Stokkhólmi. Sá staður mun vera með um 150 sæti á einni fjölförnustu götu Stokkhólms. Og í sumar munum við opna á Regeringsgatan 20, einnig mjög miðsvæðis aðeins 50 metrum frá Kungsträdgården. Við teljum að allir þessir staðir muni verða stærri en okkar stærsti staður í dag.

Þannig að næstu vikur verða spennandi. Það hefur verið mikið að gera í að undirbúa þetta allt og það er auðvitað mikið eftir, en við gætum ekki verið spenntari fyrir komandi vikum.

The 46 Places to Go in 2013 - NYTimes.com. - The New York Times fjallar um 46 spennandi staði til að ferðast tilá þessu ári. Það er erfitt að fá ekki ferðafiðring. (0)

The NFL's Secret Drug Problem - MensJournal.com. - Mögnuð grein um það hversu margir fyrrverandi NFL leikmenn eru algjörlega háðir sterkum verkjalyfjum jafnvel mörgum árum eftir að þeir hætta að spila í deildinni. Ég get ekki horft lengur á NFL þegar ég hugsa um hversu algengt er að menn fái heilaskaða og þetta gerir það ekki beint líklegra að ég byrji að horfa. (0)

Qualcomm's insane CES 2013 keynote in pictures and tweets | The Verge. Þetta er umfjöllun The Verge um kynningu Qualcomm á CES, sem er stórkostlega vandræðaleg. (0)

Áramótaávarp 2012

Posted on by

Dálítið seint þar sem ég hafði engan tíma á gamlársdag

2012 hefur verið ótrúlegt ár.

  • Við Margrét eignuðumst lítinn strák í apríl, sem við nefndum Jóhann Orra.
  • Jóhann Orri er snillingur og nánast allt í okkar lífi hefur breyst við komu hans. Á þessum átta mánuðum sem hann hefur verið með okkur hafa tilfinningar mínar í hans garð bara orðið sterkari og sterkari. Mér þótti vænt um hann frá því að ég sá hann á spítalanum í Danderyd. En með mánuðunum þá hafa tilfinningarnar mínar breyst. Þegar hann fór að brosa til mín, fatta hver ég var og sýna viðbrögð þá urðu tilfinningarnar svo miklu sterkari.
  • Jóhann Orri situr við hliðiná mér þegar ég skrifa þetta. Hóstar af því hann er veikur, lítur svo upp og brosir til mín. Þetta barn!
  • Sonur okkar hefur kúkað í klósett síðan hann varð 6 mánuða gamall. Það er algjörlega fáránlegt hversu ótrúlega miklu stolti maður getur fyllst við að sjá strákinn sinn kúka í klósett. Að vera pabbi er svo ótrúlega gefandi útaf öllum þessum litlu sigrum.
  • Gaurinn sem endar steggjapartí niðrá Hlölla á Lækjartorgi talandi við vini sína um hversu æðisleg barnið sitt er – það er núna ég.
  • Við Margrét prófuðum að vera fullorðin og fara í frí til Tenerife og gista á all-inclusive hóteli. Sú tilraun misheppnaðist. Við erum ekki tilbúin í þann pakka. Næsta ferðalag verður frumlegra.
  • Ég fór í tvær frábærar ferðir til Liverpool og sá Liverpool ná heilu stigi útúr þeim tveimur leikjum. En ferðirnar snérust um frábæra vini miklu frekar en þetta blessaða fótboltalið sem hefur gert mér lífið leitt á árinu.
  • Við Margrét seldum gömlu íbúðina okkar í Stokkhólmi og fluttum í nýja íbúð, sem hentar betur fólki með lítið barn, barnavagn og því sem tilheyrir. Við búum enn á eyjunni Södermalm af því við erum enn ung og hipp og kúl. En samt orðin mamma og pabbi og vöknum klukkan 8 á laugardagsmorgnum og allt það.

Við enduðum árið 2012 á Íslandi þar sem ég afrekaði á 14 dögum að fara í tvær 15 klukkutíma langar steggjanir, tvö frábær brúðkaup, innflutningspartí, tvö matarboð, vera þunnur eftir tvö brúðkaup, innflutningspartí og tvær steggjanir, fara í boð á aðfangadag, jóladag og annan í jólum. Fara í partí á annan í jólum, spila pool með vinum, horfa á Liverpool með vinum mínum og fara í löng brunch-boð þrisvar sinnum. Svona eru þessar Íslandsferðir – þvílík dagskrá – en þær eru samt alltaf frábærar.

Á árinu 2013 verður mikið nýtt að gerast í tengslum við Serrano í Svíþjóð og við Margrét stefnum á að fara loksins í brúðkaupsferð. Það verður fjör.

Gleðilegt ár!


Nýtt útlit

Posted on by

Nýtt ár, nýtt útlit á þessari bloggsíðu sem hefur lifað betri tíma.

Ég eyddi út slatta af dóti, sem mér fannst vera truflandi og setti inn mjög mínímalíska útfærslu af síðunni. Kannski aðallega undir áhrifum frá Marco Arment og þessari færslu frá Paul Stamatiou.

Vonandi verð ég duglegri við að halda þessari síðu uppi á þessu ári.


Photo Essay: When a Kid's Bedroom Isn't a Room | Mother Jones. - Myndir af unglingaherbergjum í ólíkum löndum. (0)