Bækur á ferðalagi

Á ferðalagi mínu um Suð Austur Asíu las ég slatta af góðum bókum. Á einhverju netkaffihúsinu tók ég saman lista um það sem ég hafði lesið og ákvað ég núna í hausverks-þunglyndi að klára hann. Veit ekki almennilega af hverju, en þetta eru þær bækur sem ég las á ferðalagi mínu.

[A long way down](http://www.amazon.co.uk/Long-Way-Down-Nick-Hornby/dp/0140287027/sr=8-1/qid=1170368834/ref=pd_ka_1/202-3663922-2339061?ie=UTF8&s=books) – Nýjasta bókin eftir Nick Hornby er ekki alveg jafngóð og hans fyrri bækur, en samt skemmtileg lesning.

[Pol Pot – The history of a nightmare](http://www.amazon.co.uk/Pol-Pot-NIghtmare-Philip-Short/dp/0719565693/sr=8-1/qid=1170368899/ref=sr_1_1/202-3663922-2339061?ie=UTF8&s=books) – Ævisaga um fyrrverandi leiðtoga Kambódíu eftir Philip Short. Að mínu mati frábær ævisaga, sem er í senn saga Kambódíu á tímum Pol Pot. Nær að vissu leyti að útskýra marga hluti í kringum Rauðu Khmerana.

[First they killed my father](http://www.amazon.co.uk/First-They-Killed-Father-Remembers/dp/1840185198/sr=8-1/qid=1170368990/ref=pd_ka_1/202-3663922-2339061?ie=UTF8&s=books) – Ævisaga Loung Ung, sem var aðeins 5 ára þegar Rauðu Khmerarnir marseruðu inní Phnom Penh og fjölskylda hennar var send í vinnubúðir útí sveit. Frábær saga eins af milljónum fórnarlamba Khmeranna.

[Off the rails in phnom penh](http://www.amazon.co.uk/Off-Rails-Phnom-Penh-Heart/dp/9748303349/sr=8-1/qid=1170369053/ref=sr_1_1/202-3663922-2339061?ie=UTF8&s=books) – Bókin sem ansi margir bakpokaferðalangar lásu í Phnom Penh. Fjallar um hóp af Vesturlandabúum, sem lifa í Phnom Penh og nýta sér til fullnustu auðveldan aðgang að ungum hórum og eiturlyfjum.

[Kafka on the shore](http://www.amazon.co.uk/Kafka-Shore-Haruki-Murakami/dp/0099458322/sr=8-1/qid=1170369523/ref=pd_ka_1/202-3663922-2339061?ie=UTF8&s=books) – Þessi bók var búinn að liggja inní stofu hjá mér ansi lengi, en systir mín gaf mér hana í jólagjöf fyrir einu eða tveim árum. Fyrsta bókin sem ég les eftir Murakami, og mér fannst hún alls ekki jafn æðisleg og dómarnir vildu meina. Ágætis bók, en gerði mig ekkert sérstaklega spenntan fyrir því að lesa meira eftir höfundinn.

**Ben Elton** – Og þá hefst Ben Elton hlutinn í þessum bókalestri. Það var nefnilega þannig að í Kambódíu og Víetnam voru alltaf til slatti af ljósrituðum enskum bókum á helstu túristastöðunum og þessar bækur voru oftast það eina sem maður komst í. Af einhverjum ástæðum var Ben Elton vinsælastur meðal höfunda hjá ljósriturunum og því endaði ég á því að lesa slatta af bókum eftir hann. Ég las [Blast from the past](http://www.amazon.co.uk/Blast-Past-Ben-Elton/dp/0552146641/sr=8-3/qid=1170369609/ref=pd_ka_3/202-3663922-2339061?ie=UTF8&s=books), sem mér fannst ágæt. [Inconceivable](http://www.amazon.co.uk/Inconceivable-Ben-Elton/dp/0552146986/sr=8-1/qid=1170369746/ref=pd_ka_1/202-3663922-2339061?ie=UTF8&s=books) sem var mjög fyndin og sirka 100 sinnum betri en myndin Maybe baby, sem var gerð eftir bókinni. [Gridlock](http://www.amazon.co.uk/Gridlock-Ben-Elton/dp/0552773565/sr=8-1/qid=1170369779/ref=pd_ka_1/202-3663922-2339061?ie=UTF8&s=books) – sem var fín og að lokum besta bókin, sem var [High Society](http://www.amazon.co.uk/High-Society-Ben-Elton/dp/0552999954/sr=8-3/qid=1170369808/ref=pd_ka_3/202-3663922-2339061?ie=UTF8&s=books) sem fjallar á skemmtilegan hátt um breskan þingmann, sem ætlar að flytja frumvarp um lögleiðingu eiturlyfja.

[American Psycho](http://www.amazon.co.uk/American-Psycho-Bret-Easton-Ellis/dp/0330448013/sr=8-2/qid=1170369861/ref=pd_ka_2/202-3663922-2339061?ie=UTF8&s=books) – Innan um franskar bækur í Luang Prabang í Laos fann ég þessa bók, sem er ágæt. Ég hafði mun meira gaman af Glamorama og Lunar Park eftir Bret Easton Ellis.

[Slaughterhouse 5](http://www.amazon.co.uk/Slaughterhouse-5-Kurt-Vonnegut/dp/0099800209/sr=8-1/qid=1170369920/ref=pd_ka_1/202-3663922-2339061?ie=UTF8&s=books) – Stríðsbækur voru vinsælar í Víetnam og þessi er auðvitað ein af þeim. Mjög góð bók.

[The Accidental Tourist](http://www.amazon.co.uk/Accidental-Tourist-Anne-Tyler/dp/0099480018/sr=8-2/qid=1170369965/ref=pd_ka_2/202-3663922-2339061?ie=UTF8&s=books) – Ágæt bók.

[Man and boy](http://www.amazon.co.uk/Man-Boy-Tony-Parsons/dp/0006512135/sr=8-1/qid=1170369989/ref=pd_ka_1/202-3663922-2339061?ie=UTF8&s=books) – Fín bók.

Og að lokum besta bókin: [Sorrow of War](http://www.amazon.co.uk/Sorrow-War-Bao-Ninh/dp/009948353X/sr=1-1/qid=1170370017/ref=sr_1_1/202-3663922-2339061?ie=UTF8&s=books) – Algjörlega frábær frásögn úr Víetnamstríðinu sögð frá sjónarhóli Víetnama. Þessi bók ásamt [The Things they carried](http://www.amazon.co.uk/Things-They-Carried-Flamingo/dp/0006543944/sr=1-1/qid=1170370074/ref=sr_1_1/202-3663922-2339061?ie=UTF8&s=books) eru bestu bækurnar sem ég hef lesið um Víetnamstríðið. Mæli með Sorrow of War fyrir alla.

Semsagt, fulltaf bókum. Ef ég ætti að mæla með einhverjum þá væri það Pol Pot ævisagan, High Society eftir Ben Elton, First they killed my father og svo Sorrow of war.

Tónlistarblogg: Girl from North Country

B0000024UM.01._AA240_SCLZZZZZZZ_.jpgAf einhverjum ástæðum, sumum skiljanlegum, öðrum ekki, hefur áhug minn á þessari vefsíðu dofnað að undanförnu. Það er ekki svo að líf mitt hafi verið viðburðarlítið, laangt því frá. En einhvern veginn hef ég minni þörf fyrir að deila reynslu minni hér.

Það kann þó að breytast og oftast þegar áhuginn á þessari síðu hefur dottið niður, þá hefur hann vaknað fljótlega aftur.

En ég ætla að taka hérna upp nýjan fídus á þessa síðu, það er smá tónlistarblogg. Ég ætla að fjalla um lög, sem ég elska – af hverju ég elska þau og skýra frá því ef ég tengi þau við ákveðna atburði í mínu lífi. Ég veit ekki hversu oft ég mun gera þetta, en þetta mun gerast öðru hvoru.

Allavegana, hérna er fyrsta lagið:

[Girl from the North Country – Johnny Cash og Bob Dylan](https://www.eoe.is/stuff/girl-north-country.mp3) – Mp3 skjal, 5,3mb

Ég hef fílað Johnny Cash í nokkur ár. Byrjaði að fíla hann áður en það varð jafn hipp og kúl og það er í dag. Ekki það að ég sé að gera lítið úr athyglinni á Cash í dag, því hann á hana svo sannarlega skilið, enda snillingur. Cash er sennilega fyrsti kántrí listamaðurinn, sem ég byrjaði að fíla. Tengdi hann eiginlega ekki við kántrí í upphafi, þar sem ég byrjaði fyrst að hlusta á American plöturnar fyrir mörgum árum.

En Cash hefur svo sannarlega hjálpað mér að yfirstíga vanþóknun mína og fordóma á kántrí tónlist. Já, fulltaf kántrí tónlist er hreinasta drasl. En það þýðir ekki að það megi flokka alla tónlistina undir einn hatt. Það er einfaldlega til hellingur af frábærri kántrí tónlist, sem ég er bara rétt að byrja að læra að meta.

Dylan uppgötvaði ég hins vegar ekki fyrr en miklu seinna. En í þessu lagi eru þeir samankomnir tveir snillingarnir, Cash og Dylan. Dylan með röddina í skrýtnum kántrí-ham og Cash með sína ótrúlega mögnuðu rödd og syngja saman þennan frábæra dúett í lagi eftir Dylan. Þetta lag er langt frá því að vera mitt uppáhaldslag með Dylan, en það að þeir syngi saman gerir það sérstakt.

Lagið er tekið af Nashville Skyline, sem Dylan tók upp í Nashville og er sennilega hreinræktaðasta kántrí platan, sem hann hefur tekið upp.

Endalok uppboðsins

oa_logo.gifJæja, uppboðinu er lokið. Það tók yfir tvo mánuði að klára öll mál tengd þessu átaki mínu.

Ég seldi nánast allt geisladiska- og dvd safnið mitt ásamt alls konar dóti, sem ég hafði litla þörf fyrir í mínu lífi.

Íbúðin og geymslan mín eru aðeins tómlegri en fyrir, en þó finn ég ekki mikið fyrir því´að þetta dót sé farið. Sem segir ansi mikið um það hversu mikið af drasli manni tekst að safna saman í gegnum árin.

Ég fékk einnig frjáls framlög frá fólki í kringum mig og fólki, sem les þessa síðu og einnig gaf ég sjálfur aðeins meira en 15% af desember laununum mínum.

Niðurstaðan? Jú, ég safnaði samtals:

500.000 krónum

Það er svo miklu, miklu meira en ég átti von á í upphafi. Viðbrögðin voru miklu meiri en ég vonaðist eftir og ég hef haft ótrúlega gaman af því að standa í þessu. Ég hef talað við fullt af skemmtilegu fólki útaf þessu og þetta hefur víða vakið athygli.

Ég vil þakka öllum, sem tóku þátt í þessu. Sérstakt hrós fær Ólöf frænka mín, sem gaf peninga sem hún safnaði með því að safna saman dósum í hverfinu sínu. Ég þakka öllum, sem keyptu hluti á uppboðinu og sem lögðu sína peninga í þetta átak með mér. Ég er viss um að peningnum okkar er vel varið hjá Oxfam.

Peningurinn allur (um 7.500 dollarar) mun allur fara til hjálparstarfs Oxfam í Mið-Ameríku, þar sem hálf milljón króna er mikill peningur. Ég millifærði peningana til Oxfam síðasta föstudag og ég treysti Oxfam mjög vel til þess að koma þessum peningum í góðar hendur. Ég mun setja inn hérna staðfestingar frá Oxfam fyrir peningagjöfinni þegar þær koma.

Jafnrétti?

Ekki það að ég hafi minnsta vit á málinu (eða það komi mér hið minnsta við), en af hverju í ÓSKÖPUNUM gera menn strax ráð fyrir því að kyn þáttakenda hljóti að [skipta einhverju máli í nýsköpunarverðlaunum forsetans](http://www.visir.is/apps/pbcs.dll/article?AID=/20060224/FRETTIR01/60224018/1091).

Halda menn því virkilega fram að það séu líkur á því að dómnefndin hafi hafnað konum vegna kyns þeirra? Þetta er hreinlega ofar mínum skilningi, en kannski horfi ég bara of barnalega á hlutina. Ég á bara bágt með að trúa því að menn láti kyn þáttakenda hafa áhrif á sig, sérstaklega þegar um verðlaun forsetans er að ræða.

Er ekki nær lagi að [gagnrýnendurnir](http://www.runolfur.is/?p=165) séu að reyna að slá sér upp til riddara, sem einhvers konar jafnréttishetjum?

Barca!

Hólí sjitt hvað [Barcelona er gott lið](http://www.uefa.com/Competitions/UCL/FixturesResults/Round=2202/match=1102843/report=RP.html)! Það er yyyyndislegt að sjá Chelsea liðið tekið í nefið og það er ekki leiðinlegt þegar það er annað af upphaáldsliðunum mínum, sem á í hlut.

Lionel Messi er 18 ára! Hann er fæddur 1987. Eru menn ekkert að grínast? Þvílíkur ótrúlegur snillingur.

Barca átti 23 skot á mark Chelsea í leiknum í kvöld. 23 skot á móti CHELSEA! Á útivelli. Já, þeir voru einum fleiri en það skýrir ekki allt. Ég segi það óhræddur að Barcelona er besta knattspyrnulið í heimi í dag. Held að aðeins Juventus gæti stöðvað þetta Barcelona lið í Meistaradeildinni.

Ég er búinn að vera hálf þunglyndur útaf Liverpoo [tapinu](https://www.eoe.is/liverpool/gamalt/2006/02/21/21.47.04/) í gær, en Barca tókst að koma mér aftur í gott skap. Húrra fyrir því. Og húrra fyrir því að ég verð á Nou Camp eftir tvær vikur til að horfa á seinni leikinn! HÚRRA! Já, og húrra fyrir fótbolta!

Breaking News

*Nú skiptum við “live” til Lundúna!*

“Gott kvöld. Hér í London er allt með kyrrum kjörum. Þó eru helstu tíðindin sú að Halldór Ásgrímsson er á Stamford Bridge. Ég endurtek, Halldór Ásgrímsson er á Stamford Bridge!!! Og hann ætlar að horfa á fótbolta í kvöld! Ég endurtek, *fótbolta*”

*Fyrirgefið, við þurfum að rjúfa útsendingu frá Lundúnum*

“Í dómssal í Reykjavík er ákæruvaldið að rífast við sakborninga útaf innflutningi á fjórum bílum. Ég endurtek, innflutning á *fjórum bílum*.”

*Fleira er ekki í fréttum í kvöld.*

Múrinn og Hugo

Chavez11.jpgÞau á Múrnum virðast hafa afskaplega veikan blett fyrir Hugo Chávez. Af hverju er erfitt að skilja.

Í dag er á Múrnum grein, þar sem agnúast er útí (að mínu mati hálf kjánalegar) yfirlýsingar Condoleeza Rice um Hugo Chávez: [Rice finnur rauðu hættuna í suðri](http://www.murinn.is/eldra_b.asp?nr=1886&gerd=Frettir&arg=7). Í þeirri grein er að finna marga skringilega punkta (feitletranir mínar):

>Rice sagði að ríkisstjórn Chávez væri ógn við lýðræðið í þessum heimshluta og að valdhafar í Caracas hvettu stjórnvöld annarra ríkja til að feta sig út af braut lýðræðislegra stjórnarhátta. **Það virðist því hafa farið framhjá fólki í Hvíta húsinu að Hugo Chávez var kjörinn forseti Venesúela í lýðræðislegum kosningum á sínum tíma, vann með yfirburðum þjóðaratkvæðagreiðslu þar sem landsmönnum gafst kostur á að lýsa á hann vantrausti og að flokkarnir sem styðja ríkisstjórn Chávez unnu stórsigur í þingkosningum í byrjun desember á síðasta ári.** Framlag Bandaríkjastjórnar til varnar lýðræðinu þá var að hvetja stjórnarandstöðuflokkana til að sniðganga kosningarnar, sem þeir gerðu með þessum ljómandi góða árangri

Chávez **ER** ógn við lýðræðið. Þrátt fyrir að hann sé á móti Bandaríkjunum, þá þýðir það ekki að hann sé góður gæi. Já, hann vann lýðræðislegar kosningar, en það afsakar hins vegar ekki hvað hann hefur gert síðan hann komst til valda.

Bara til að nefna nokkra hluti, þá hefur Chávez t.d. lagt niður eftri deild þingsins í Venezuela, þannig að núna þarf hann bara að fara í gegnum eina deild með ný lög. Vegna þess að hann hafði aðeins lítinn meirihluta á þingi í upphafi, þá breytti hann lögunum þannig að nú þarf ekki lengur 2/3 atkvæða til að breyta lögum, heldur aðeins einfaldan meirihluta. Hann hefur nú algjöra stjórn á hernum, en þingið hafði áður hlutverk í stjórn hersins. Chávez stjórnar einnig stofnuninni, sem sér um kosningar í Venezuela.

Chávez hefur gefið sjálfum sér leyfi til að reka dómara og hefur lengt kjörtímabilið sitt um eitt ár. Hann hefur stækkað hæstarétt úr 20 í 32 dómurum og með því fyllt réttinn af dómurum hliðhollum sjálfum sér. Hugo Chávez ER ógn við lýðræðið í þessum heimshluta. Hversu mikið þarf hann eiginlega að gera að mati Múrsverja til að teljast ógn við lýðræði?

>Rice sagði ennfremur að hin nánu tengsl Venesúela og Kúbu væru „sérstaklega hættuleg“ og að „alþjóðasamfélagið“ yrði að vera betur á verði fyrir hönd almennings í Venesúela. Ekki er ljóst hverjum er hætta búin af þessum tengslum

Hvað með fólkinu sjálfu í landinu? Fólki, sem gat mótmælt í Venezuela. Það þykir hreint ekki svo sjálfsagt í dag að mótmæla í Venezuela í dag og pólitískum föngum hefur fjölgað undir stjórn Hugo Cavez. Hægt er að handtaka fólk ef það sýnir embættismönnum “vanvirðingu”. Auðvitað er ástandið í Venezuela, hvað varðar réttindi borgaranna til að mótmæla, ekki jafn slæmt og á Kúbu, en Chávez hefur ítrekað líst aðdáun sinni á Castro og hans stjórnarháttum. Hann hefur ekki (allavegana ekki svo ég viti) mótmælt meðferð Fidels á pólitískum andstæðingum sínum.

>Vissulega er það fleira sem stjórnin í Caracas hefur gert til að skaprauna George W. Bush og félögum. Til dæmis lagði hún líknarfélögum til ódýra olíu til húshitunar fyrir fátækt fólk í Bandaríkjunum fyrr í vetur og hefur keypt heilbrigðisþjónustu af Kúbverjum í stórum stíl.

Hvað nákvæmlega hefur SH fyrir sér í þessu? Getur hann nefnt einhver dæmi þess að GWB hafi pirrað sig útí að Venezuela hafi selt ódýra olíu til líknarfélaga? Eða er þetta bara byggt á almennum sleggjudómum, sem þeir á Múrnum virðast stundum hafa útí allt og alla, sem koma frá Bandaríkjunum?

>Ekki þarf að efast um að ríkisstjórn Hugo Chávez verðskuldi ýmiss konar gagnrýni eins og allar aðrar ríkisstjórnir.

Hvaða bull er þetta eiginlega? Á sama hátt væri hægt að skrifa að ríkisstjórnin í Norður Kóreu ætti skilið gagnrýni einsog allar aðrar ríkisstjórnir. Málið er auðvitað að ríkisstjórnin í Venezulea á skilið margfalt meiri gagnrýni en flestar aðrar ríkisstjórnir. Það er ekki hægt að gera lítið úr réttmætri gagnrýni á Chávez með því að halda því fram að allar ríkisstjórnir eigi skilið gagnrýni.

Þeir á Múrnum virðast hafa skringilega veikan blett fyrir Hugo Chávez. Já, Hugo hefur haldið úti verkefnum, sem hafa skilað einhverju til fátæks fólks í landinu. En hann hefur getað leyft sér þau verkefni vegna gríðarlega hás olíuverðs. Og já, hann er töffari, sem dissar Bandaríkin. (og já, hann fílar basbeall – að mínu mati mikill kostur)

En ef ekki væri fyrir hátt olíuverð, þá væri þessi bólívarska bylting hans farin á hausinn og það sem eftir stæði væri að lýðræðið í Venezuela stendur umtalsvert veikari fótum en áður.

Hvalkjöt á diskinn minn (hóst)

Ég get hreinlega ekki lengur verið með línurit sem efstu færslu á þessari bloggsíðu. Verð bara að skrifa…um eitthvað.

Allavegana…

Á miðvikudaginn var ég með útlendinga í mat á Humarhúsinu. Það er ekki frásögu færandi nema fyrir eina staðreynd. Á matseðli Humarhússins er nefnilega boðið uppá hvalkjöt í forrétt (ásamt hrossakjöti – “namminamm” ). Ég hvatti útlendingana til að prófa án teljandi árangurs. Þegar þau svo spurðu mig nánar útí hvalkjötið, þá komst ég að því að ég hafði sjálfur aldrei prófað hval.

Ég hef hins vegar verið undir stanslausum áróðri íslenskra yfirvalda og hvalveiðiáhugamanna nær allt mitt líf. Sá áróður gengur útá tvennt: 1) Hvalkjöt bragðast yndislega, hreinlega einsog besta nautasteik (þetta með nautasteikina hef ég heyrt svona 100 sinnum) – og 2) Hvalkjöt er brjálæðsilega vinsælt og selst alltaf upp í verslunum um leið og það er til.

Ég vissi að seinni punkturinn væri tómt þvaður, en var ekki viss um þann fyrri.

Ég ákvað að prófa matinn. Hvalkjötið kom á borðið að japönskum stíl, hrátt, borið fram með soja sósu og wasabi. Það er skemmst frá því að segja að kjötið var *viðbjóður*. Ekki alveg jafnviðbjóðslegt og [skata](https://www.eoe.is/gamalt/2005/12/23/14.39.38) (sem fólk hafði líka logið að mér að væri yndisleg á bragðið), en samt verulega vont.

*(Ég tek það fram að þetta vonda bragð var svo sannarlega ekki matreiðslumönnum á Humarhúsinu að kenna, enda maturinn þar (með þessari einu undantekningu) algjörlega frábær. Einnig var þjónustan frábær, því um leið og þjónninn sá að ég borðaði ekki kjötið, þá bauð hún mér uppá fulla endurgreiðslu.)*

Hvalkjöt er ekki nálægt því að bragðast einsog “besta nautakjöt” einsog spunameistararnir hafa haldið fram. Já, það lítur svipað út, en bragðið er ekki nálægt því. Ég er hreinlega hættur að taka fólk trúanlega þegar það talar um að þjóðlegur íslenskur matur sé góður. Ég hef því ákveðið að prófa ekki restina af þessu þjóðlega gumsi, sem menn halda fram að sé einsog sælgæti á bragðið. Þetta á því við um hákarl, hrútspunga og allt þetta jukk, sem ég hef ekki prófað síðan að ég bragðlaukarnir mínir þróuðust frá því að þykja sandur góður á bragðið.

p.s. Bendi líka á [þessa grein í Grapevine](http://www.grapevine.is/Undirflokkar.aspx?id=1063), sem fjallar að hluta til um jákvæðar hvalaveiðgreinar á vísi.is